ລູກຊາຍຂອງເຮົາເອີຍ, ຈົ່ງໃສ່ໃຈໃນພຣະທຳຂອງເຮົາ, ຟັງສຽງຂອງເຮົາຢ່າງງຽບໆ ແລະ ເຮົາຈະໃຫ້ການເປີດເຜີຍແກ່ເຈົ້າ. ຈົ່ງງຽບສະຫງົບຢູ່ພາຍໃນເຮົາ ຍ້ອນເຮົາເປັນພຣະເຈົ້າຂອງເຈົ້າ ແລະ ເປັນພຣະຜູ້ໄຖ່ອົງດຽວຂອງເຈົ້າ. ພວກເຈົ້າຕ້ອງເຮັດໃຫ້ຫົວໃຈຂອງພວກເຈົ້າງຽບຢູ່ຕະຫຼອດເວລາ ແລະ ດຳລົງຊີວິດຢູ່ພາຍໃນເຮົາ; ເຮົາເປັນສິລາຂອງເຈົ້າ, ເປັນຜູ້ຄໍ້າເຈົ້າ. ຢ່າມີຄວາມຄິດອື່ນ, ແຕ່ຈົ່ງເພິ່ງພາເຮົາຢ່າງເຕັມໃຈຂອງເຈົ້າ ແລະ ເຮົາຈະປາກົດແກ່ພວກເຈົ້າຢ່າງແນ່ນອນ, ເຮົາເປັນພຣະເຈົ້າຂອງພວກເຈົ້າ! ໂອ້, ພວກຂີ້ສົງໄສເຫຼົ່ານັ້ນເອີຍ! ພວກເຂົາບໍ່ສາມາດຍຶດໝັ້ນຢ່າງແນ່ນອນ ແລະ ພວກເຂົາຈະບໍ່ໄດ້ຮັບຫຍັງເລີຍ. ເຈົ້າຕ້ອງຮູ້ວ່າໃນຕອນນີ້ແມ່ນເວລາໃດ, ມັນຊ່າງເປັນເວລາທີ່ສຳຄັນ! ມັນຊ່າງສຳຄັນ! ຢ່າວຸ້ນວາຍກັບຕົວເອງໃນສິ່ງທີ່ບໍ່ມີປະໂຫຍດ; ຫຍັບເຂົ້າມາໃກ້ເຮົາໄວໆ, ສົນທະນາກັບເຮົາ ແລະ ເຮົາຈະເປີດເຜີຍຄວາມເລິກລັບທຸກຢ່າງໃຫ້ກັບພວກເຈົ້າ.

ເຈົ້າຕ້ອງຟັງພຣະທຳແຫ່ງການຊີ້ນໍາທຸກຂໍ້ຈາກພຣະວິນຍານ ແລະ ໃຫ້ນຳມາໃສ່ໃຈ. ຫຼາຍຄັ້ງ ທີ່ເຈົ້າໄດ້ຍິນພຣະທຳຂອງເຮົາ ແລະ ຫຼັງຈາກນັ້ນກໍລືມພຣະທຳເຫຼົ່ານັ້ນ. ໂອ ຜູ້ເຊິ່ງບໍ່ມີຄວາມຄິດເອີຍ! ເຈົ້າໄດ້ສູນເສຍການອວຍພອນຢ່າງຫຼວງຫຼາຍ! ບັດນີ້ ເຈົ້າຕ້ອງຟັງຢ່າງລະມັດລະວັງ ແລະ ໃສ່ໃຈກັບພຣະທຳຂອງເຮົາ, ສົນທະນາກັບເຮົາຫຼາຍຂຶ້ນ ແລະ ຫຍັບເຂົ້າໃກ້ເຮົາຫຼາຍຂຶ້ນ. ເຮົາຈະຊີ້ນໍາເຈົ້າໃນທຸກສິ່ງທີ່ເຈົ້າບໍ່ເຂົ້າໃຈ ແລະ ເຮົາຈະນໍາພາພວກເຈົ້າກ້າວໄປຂ້າງໜ້າ. ຢ່າຄິດແຕ່ເລື່ອງສົນທະນາກັບຄົນອື່ນຫຼາຍ. ໃນປັດຈຸບັນ ມີຫຼາຍຄົນທີ່ເທດສະໜາຕາມຕົວຄໍາເວົ້າ ແລະ ທິດສະດີ ແລະ ມີໜ້ອຍຄົນເກີນໄປທີ່ມີຄວາມເປັນຈິງຂອງເຮົາຢ່າງແທ້ຈິງ. ການສົນທະນາຂອງພວກເຂົາເຮັດໃຫ້ຄົນສັບສົນ ແລະ ມຶນ ໂດຍບໍ່ຮູ້ວິທີກ້າວໜ້າ. ການຟັງພວກເຂົາ ເຮັດໃຫ້ຄົນອາດພຽງເຂົ້າໃຈກ່ຽວກັບຄໍາເວົ້າ ແລະ ທິດສະດີຂຶ້ນໜ້ອຍໜຶ່ງ. ເຈົ້າຕ້ອງເຝົ້າເບິ່ງບາດກ້າວຂອງເຈົ້າ ແລະ ເຮັດໃຫ້ຫົວໃຈຂອງພວກເຈົ້າດຳລົງຊີວິດຢູ່ຕໍ່ໜ້າເຮົາສະເໝີ, ເຈົ້າຕ້ອງສື່ສານກັບເຮົາ, ຫຍັບເຂົ້າໃກ້ເຮົາ ແລະ ເຮົາຈະໃຫ້ເຈົ້າເຫັນສິ່ງທີ່ເຈົ້າບໍ່ເຂົ້າໃຈ. ໃສ່ໃຈໃນການເວົ້າຂອງເຈົ້າ, ເຝົ້າສັງເກດເບິ່ງຫົວໃຈຂອງເຈົ້າຕະຫຼອດເວລາ ແລະ ຍ່າງຕາມເສັ້ນທາງທີ່ເຮົາຍ່າງ.

ມັນຈະບໍ່ດົນອີກແລ້ວ; ຍັງເຫຼືອເວລາໜ້ອຍດຽວ. ໃຫ້ຮີບຟ້າວປະຖິ້ມທຸກສິ່ງ ຍົກເວັ້ນເຮົາ ແລະ ມາຕິດຕາມເຮົາ! ເຮົາຈະບໍ່ຂົ່ມເຫັງພວກເຈົ້າ. ຫຼາຍຄັ້ງທີ່ພວກເຈົ້າເຂົ້າໃຈຜິດກ່ຽວກັບການກະທຳຂອງເຮົາ, ແຕ່ເຈົ້າຮູ້ບໍວ່າ ເຮົາຮັກພວກເຈົ້າຫຼາຍສໍ່າໃດ? ໂອ້, ເຈົ້າພຽງແຕ່ບໍ່ເຂົ້າໃຈຫົວໃຈຂອງເຮົາ. ບໍ່ວ່າພວກເຈົ້າສົງໄສແນວໃດ, ບໍ່ວ່າພວກເຈົ້າຕິດໜີ້ເຮົາຫຼາຍສໍ່າໃດກໍຕາມ, ເຮົາກໍຈະບໍ່ຈົດຈໍາມັນ ແລະ ເຖິງຢ່າງໃດກໍຕາມ ເຮົາກໍຈະເລືອກເອົາພວກເຈົ້າເພື່ອກ້າວໄປຂ້າງໜ້າ ແລະ ປະຕິບັດຕາມເຈດຕະນາຂອງເຮົາ.

ມື້ນີ້ບໍ່ແມ່ນເວລາທີ່ຈະມາຊັກຊ້າ. ຖ້າພວກເຈົ້າຍັງມີເຈດຕະນາອື່ນ, ການພິພາກສາຂອງເຮົາກໍຈະມາສູ່ພວກເຈົ້າ. ຖ້າພວກເຈົ້າອອກຈາກເຮົາແມ່ນແຕ່ຊົ່ວຄາວ, ພວກເຈົ້າກໍຈະກາຍເປັນເມຍຂອງໂລດ. ຕອນນີ້ຈັງຫວະວຽກງານຂອງພຣະວິນຍານບໍລິສຸດກຳລັງໄວຂຶ້ນ ແລະ ຜູ້ທີ່ບໍ່ສາມາດກ້າວທັນແສງສະຫວ່າງໃໝ່ກໍຕົກຢູ່ໃນອັນຕະລາຍ ແລະ ຜູ້ທີ່ບໍ່ເຝົ້າລະວັງກໍຈະຖືກປະຖິ້ມ; ເຈົ້າຕ້ອງປົກປ້ອງຕົນເອງ. ເຈົ້າຄວນຮູ້ວ່າສະພາບແວດລ້ອມທັງໝົດທີ່ຢູ່ອ້ອມຮອບຕົວເຈົ້າແມ່ນໄດ້ຮັບການອະນຸຍາດ ແລະ ຈັດແຈງໂດຍເຮົາ. ຈົ່ງເຂົ້າໃຈເລື່ອງນີ້ໃຫ້ແຈ່ມແຈ້ງ ແລະ ເຮັດໃຫ້ຫົວໃຈຂອງເຮົາພໍໃຈໃນສະພາບແວດລ້ອມທີ່ເຮົາໄດ້ມອບໃຫ້ກັບເຈົ້າ. ຢ່າຢ້ານສິ່ງນັ້ນສິ່ງນີ້, ພຣະເຈົ້າອົງຊົງລິດທານຸພາບສູງສຸດແຫ່ງກອງທັບຈະສະຖິດຢູ່ກັບເຈົ້າຢ່າງແນ່ນອນ; ພຣະອົງເຮັດໜ້າທີ່ເປັນຜູ້ສະໜັບສະໜູນ ແລະ ເປັນໂລ່ກຳບັງຂອງພວກເຈົ້າ. ມື້ນີ້, ຜູ້ຄົນມີຄວາມຄິດຫຼົງຜິດຫຼາຍເກີນໄປ ເຊິ່ງບັງຄັບໃຫ້ເຮົາຕ້ອງສະແດງເຈດຕະນາຂອງເຮົາຜ່ານຜູ້ທີ່ຄົນອື່ນດູຖູກ, ດ້ວຍເຫດນັ້ນຈຶ່ງເຮັດໃຫ້ຜູ້ທີ່ຖືຕົນວ່າສໍາຄັນ, ຖືຕົນວ່າຊອບທຳ, ອວດດີ, ທະນົງໂຕ, ມີຄວາມທະເຍີທະຍານ ແລະ ຜູ້ທີ່ຍຶດຕຳແໜ່ງທີ່ສູງສົ່ງນັ້ນຕ້ອງອັບອາຍ. ຕາບໃດທີ່ພວກເຈົ້າຄໍານຶງເຖິງພາລະຂອງເຮົາຢ່າງຈິງໃຈ, ເຮົາກໍຈະກຽມທຸກສິ່ງໄວ້ໃຫ້ພວກເຈົ້າ. ພຽງແຕ່ຕິດຕາມເຮົາ!